Galasiers 5: 1
Christus het ons vrygemaak om werklik vry te wees. Staan dan vas in hierdie vryheid en moet julle nie weer onder ‘n slawejuk laat indwing nie.

Wat beteken dit vir ‘n kind van die Here wanneer hy of sy hoor dat hy werlklik vry is?
God het gekom om vir ons vryheid te kom gee. Dit beteken egter nie noodwendig dat ons vry is van al die verskriklike dinge waarmee ons gekomfronteer word in die wêreld nie. Dit beteken nie dat ons nooit pyn en lyding sal ervaar nie. Ons is nie gevrywaar van gevare nie.

Hierdie vryheid is ‘n ten spyte van vryheid. Dis vryheid omdat ons as kinders van God weet, ten spyte van al die pyn en lyding van die wêreld, ten spyte van my omstandighede, ten spyte van siekte en dood kan ek steeds vrede hê, kan ek steeds vreugde ervaar, kan ek weet dat hierdie dinge nie my identiteit, my waarde bepaal nie. Die rede? Want jy is ‘n kind van God. Dit beteken dat al gebeur enige iets met jou, jy is veilig by God. Al is my omstandighede hoe sleg, God is by my en nie eers die dood kan ons skei van sy liefde nie.
God het ons nie kom vry maak sodat ons nie die laste van die wêreld hoef te beleef nie, inteendeel Hy sê dat ons vervolg sal word. God het ons kom vry maak van ons sonde sodat ons nie meer gedefinieer hoef te word deur ons sonde, deur ons pyn nie. Ons is kinders van God en omdat ons kinders van God is, kan ons deur enige iets kom.

God sê vir ons dat hy by ons is selfs al gaan ons deur donker dieptes soos in Psalm 23 staan, is Hy steeds by ons.
Ons is in die middel van ‘n pandemie, en dit gaan gepaard met ‘n klomp emosies, dalk kwaad, dalk vrees, dalk vrees dat die mense wat ek liefhet iets mag oorkom en ek kan nie by hulle wees of uitkom nie. God kom en sê vir ons dat ons onsself en ons naasbestaandes, die wêreld in Sy hande kan plaas en weet dat ons in die beste hande moontlik is. Ons kan vrede vind in die feit dat God ons werklik liefhet, en al sou ons iets oorkom is ons vry en veilig in God se hande. Ons as kinders van God kan ‘n verskil maak, want ons weet al gebeur wat okal met my, God is met jou.

Jy is seker, soos baie ander mense op ‘n plek waar jy dalk erg moedeloos is. Jy is dalk op ‘n plek waar die angstigheid in jou gemoed baie hoog is in vergelyking met voor die algehele afsondering. Jou lewe is teen hierdie tyd al op verskeie maniere direk geraak deur die impak van COVID-19. Ekonomies, geestelik, fisies en iemand na aan jou of jy is dalk gediagnoseer. Jy is nagte wakker omtrent hoe ons weer die stukke van impak hierdie gebeurtenis gaan optel. Moedeloos. Wel, daar is dalk iemand se verhaal wat jou kan bemoedig en inspireer.
Lees saam met my…

Lukas 24:13-35
Die twee Emmausgangers is oppad terug huistoe. Daar is groot skok, hartseer en teleurstelling – ‘n moedeloosheid in hulle harte. Dit is baie duidelik dat hulle volgelinge van Jesus was en saam met Hom geleef het. Nou is Hy dood. Dit is nie al nie. Nou is dit so dat Jesus se liggaam nie meer in die graf is nie. Die hoop wat hulle gehad het is finaal weg.

Daar is die verwagting van Jesus se volgelinge gewees dat Hy die Messias gaan wees. Hy is die een wat Israel gaan verlos. God het ‘n ander plan gehad met Sy verlossingsplan. Die doel voor oë is gewees om mense met Hom te versoen. Daarom het niks van die gebeure die afgelope tyd in Jerusalem vir hulle sin gemaak nie.
Dit is baie interessant dat iemand wat saam met Jesus geleef het, Hom nie herken wanneer hulle Hom op die pad ontmoet nie. Die passiewe vorm word hier gebruik – wat daarop neerkom dat die Emmausgangers die onvermoë het om te sien wie saam met hulle loop. Jesus noem dit dat hulle ‘n gebrek aan begrip het oor wie Hy is, en oor wat werklik in Jerusalem gebeur het. Sien julle dit nie raak nie. Dit alles waarvan daar vertel word deur die eeue heen het tot vervulling gekom.

Hierdie reis waarop hierdie twee mense is, is nie iets buitengewoons nie. Dan is daar hierdie vreemdeling wat saam met hulle kom stap. Hy vra nie om by hulle oor te bly vir die aand nie. Hy maak of Hy verbygaan.

Hulle nooi dan hierdie vreemdeling om by hulle oor te bly. Dan gebeur die vreemdste ding. Hierdie vreemdeling tree op as die gasheer en nie die gas nie. Is daar dalk ‘n verbintenis tussen die laaste paasmaaltyd. Daarom herken hulle Hom?

Jesus word die gasheer in die huis van die Emmausgangers en hulle die gaste? Jesus sit saam met hulle en eet. Toe Hy die brood breek besef hulle wie Hy is. Stephan Joubert skryf dat dit hier is waar die grootste teleurstelling in die grootste geleentheid verander het. Mag jou teleurstelling, moedeloosheid, bekommernis en hartseer in ‘n geleentheid verander wanneer Jesus weer die gasheer in jou lewe word. Jy het dalk self siek geword en ook so baie verloor, maar daar is hoop!!
Dit is hier waar die verhaal ‘n keurpunt bereik en die Emmausgangers besef, dit is die opgestane Here wat by hulle aan huis is. Hy het regtig opgestaan. Daar hardloop hulle in die donker al die pad terug na Jerusalem om die ander te gaan vertel dat Jesus werklik opgestaan het.

Wat leef in jou hart? Het die opgestane Here Jesus in jou lewe bekend geword?“ Wees stil en ondersoek in verwondering wanneer jou hart ook warm geword het. Mag daar vir jou hoop daarin wees. Hoop om vorentoe te gaan. Hoop om op te staan, hoop om te lewe. Ek sluit af met ‘n aanhaling van een van my oud-dosente
“Die verhale van die opgestane Christus vertel en getuig van hoop…Hoop ja, maar nooit besittings nie.” – Julian Muller

Wat is dit wat sal gebeur in jou lewe wanneer jy toelaat dat die opgestane Here optree as gasheer in jou lewe? Hoeveel anderste gaan jou lewe lyk? Hoeveel hoop leef daar in jou hart? Hoop op Hom en nie besittings nie?

Ds Deon Louw, NG Kerk Alberton-Wes

Dit is altyd lekker om te lees wat die Here op aarde gedoen het en vir mense gesê het. Die besef het stadig in my gegroei dat Hy altyd positief was wanneer Hy met mense besig was. Net teenoor die kerkleiers was Hy baie krities.

En toe lees ek Johannes 5 -Op die Sabbatdag… het Hy ‘n negatiewe opmerking teenoor ‘n jongman gemaak. Die man by die Bad van Betesda. Hy het vir daardie geneesde man gesê: ”Kyk, jy is nou gesond. Moet nou nie meer sonde doen nie, sodat daar nie iets ergers met jou gebeur nie.” Verbasend!

Die lam man van Betesda se lewe is vir my ‘n kontras teenoor Johannes 9 se man wat blind gebore is. Die blinde het, na hy kon sien Jesus so verdedig; hy het verskil van sy ouers en selfs opgestaan teen die kerkleiers wat Jesus wou afkraak. Jesus het sulke mooi dinge oor hom gesê, soos dat Hy (Jesus) juis aarde toe gekom het sodat mense soos hy(blinde) kon sien.

Ai en die Lam man kla oor niemand hom in die bad wil ingooi nie (alles en almal skuld hom iets). Hy kry sy bene terug, maar dan nog leef hy asof hy die “benadeelde” is en verkla hy vir Jesus by die kerkleiers. Ek sien ‘n groot verskil tussen die twee geneesdes, in hul gees en hul dankbaarheid: Die een kies om Jesus te aanbid, die ander kies om Hom te verkla.

Elkeen kan kies wat sy/haar ingesteldheid vandag gaan wees. Dat jy kan leef, kan glo, kan gesond wees, is so groot geskenk. Gebruik dan die lewe wat jy het om nie sonde te doen nie, maar om eerder met dankbaarheid God te aanbid en verkondig en groot te maak.
Kom ons kies om te lewe! Kies om te aanbid.

Phillip Coetzee – Brackenhurst Gemeente

DF Malherbe roep in sy bekende gedig: Wat is die slaap ‘n wondersoete ding!
Slaap is genadetyd en Godtyd.

Psalm 127:2: Tevergeefs dat julle vroeg opstaan en laat gaan slaap om met moeite ‘n bestaan te maak. Vir dié wat Hy liefhet, gee die Here dit in hulle slaap.
God het ons gemaak om te rus, dit is selfs in die skepping ingebou en in die skeppingsverhaal lees ons dat God die 7de dag gerus het en dit ook vir ons as Sabbat ingestel en geheilig het. Sabbat beteken om op te hou en te rus.
God doen soveel met ons in ons slaap: Hy vernuwe ons telkens na liggaam, siel en gees. Hoe dikwels ervaar ons nie soggens hoe ‘n nuwe dag ons blink en vars begroet nie. Die varsheid van die oggend het nie net met die oggend te doen nie maar ook met ons vernuwende kyk en uitsig op die wêreld om ons.

Slaap is natuurlik ook ‘n werkwoord, dis iets wat jy gaan doen. Maar dis ‘n soort paradoksale werkwoord, eintlik moet jy ophou om te doen en gaan rus. So stem dit ooreen met geloof. Geloof is om iets te doen maar om te glo moet jy eintlik ophou om op jouself en jou werke en prestasies te vertrou en jy stel jou vertroue in God. Daarom sê Psalm 127 ook in vers 1:
As die Here die huis nie bou nie, swoeg dié wat daaraan bou, tevergeefs.
As die Here die stad nie beskerm nie, waak dié wat dit beskerm, tevergeefs.

Slaap is daarom ook oorgeetyd en ‘n daad van vertroue. Jy gaan lê jou as’t ware in vertroue in die arms van God, jou Hemelse Vader. Malherbe het in sy gedig sy kind so sien aan die slaap raak: “Ek merk hoe langsaam hy genaak wat drome soet tot werklikhede maak …. in vaderarms rus my lieweling”. Dan sy wens aan die end van sy gedig: “sluit so my oë, God, as ek gaan rus.

Maar wat as die rus my ontwyk? As spanning en angs my laat rondrol en ek doodeenvoudig nie kan slaap nie of reeds te vroeg wakker lê.
Ook dit kan Godtyd wees. Psalm 16:6-9 sê: “selfs in die nag bly ek bewus van wat Hy my leer.
8 Ek het die Here altyd by my: omdat Hy by my is, sal ek nie struikel nie. Daarom is ek bly en juig ek en voel ek my veilig”

Wakkertyd is oefentyd in vertroue in die Here, word rustig in Hom en gee al jou bekommernise aan Hom. Dit is ook belydenistyd, haal rustig asem en bely jou skuld, sonde en laste met elke uitasem en dank God vir sy verhoring met elke inasem. Dit is ook dank en loftyd, laat jou gedagtes gaan na al die goeie wat God jou gegee het en dank en loof Hom daarvoor. Dis ook voorbiddingstyd waar jy vir almal en alles rondom jou kan bid. Bid die Onse Vader en bekende dele soos Psalm 23. Word dan net stil in die teenwoordigheid van God.

Slaap of wakker, dit bly genadetyd

Piet Botha – Brackendal

Die vraag waar is God in hierdie tyd, is op almal se lippe. Party beweer dat God COVID 19 oor ons gebring het, om een of ander les te leer. Ander sê weer ons is soos Job deur die duiwel versoek en ons met net vas staan in die geloof.

Maar kom ons staan net vir ‘n oomblik stil by God. Kom ons gaan raak stil en fokus op die beloftes wat God regtig vir ons gee. Nêrens in die Bybel praat dit spesifiek van COVID 19 nie, maar in die tyd wat die Bybel geskryf is, was daar ook ‘n “groot griep” of twee wat die mense baie siek gemaak het, en baie om die lewe gebring het. Hierdie is nie die wêreld se eerste pandemie nie.

So hoewel ons dalk mag voel asof ons gestraf word, of beproef word is daar ‘n paar beloftes waaraan ons kan vashou. Heb 13:5 sê vir ons “Ek sal jou nooit alleen los nie en Ek sal jou nooit in die steek laat nie”; Jes 43:1 “Ek het jou op die naam geroep, jy is myne”; Joh 14:27 “Vrede laat Ek vir julle na; my vrede gee Ek vir julle. Die vrede wat Ek vir julle gee, is nie die soort wat die wêreld gee nie. Julle moet nie ontsteld wees nie, en julle moet nie bang wees nie”. En dit is maar net om ‘n paar te noem.

In werklikheid maak dit nie saak of hierdie virus in ‘n vismark of laboratorium begin is nie, wat saak maak is dat ons nou, saam, in isolasie leef. Dat almal van ons dieselfde emosies ervaar en dat ons almal al moeg is vir ons huise. En wanneer ons so voel en ons Bybels oopslaan vir raad, moet ons nie allerhande snaakse afleidings maak nie. Hou net vas aan God se beloftes, Hy sien jou raak en Hy is oneindigend lief vir jou. Jy is Sy gunsteling mens en Hy sal jou nie in die steek laat nie.

Lorinda Schoonwinkel – South Crest Gemeente

1 Johannes 1:8-10
As ons beweer dat ons nie sonde het nie, bedrieg ons onsself en is die waarheid nie in ons nie. Maar as ons ons sondes bely – Hy is getrou en regverdig, Hy vergewe ons ons sondes en reinig ons van alle ongeregtigheid. As ons beweer dat ons nie gesondig het nie, maak ons Hom tot leuenaar en is sy woord nie in ons nie.

Een van die vereistes om na binne te reis, m.a.w om jouself beter te leer ken en om emosioneel en geestelik te groei, is om bereid te wees om te erken dat jy ook verkeerd kan wees.

Nou hoor ek jou sê: “Ja natuurlik! Almal maak foute!” maar dis nie so maklik nie want ons almal hou te veel van reg wees, is dit nie? Ek moet herken, om verkeerd te wees is vir my niks lekker nie! Ek sal soms baie dinge doen om dit te vermy maar wat sal jy daarvan dink as ek vir jou sou sê dat om verkeerd te wees ‘n gawe is. En om te kan erken jy is verkeerd kan jou lewe verander. Luister my uit.

Op ‘n redelike jong ouderdom, wanneer ons begin selfbewus word, fokus ons almeer daarop om nie foute te maak nie. Ons fokus daarop om nie iets te doen of te sê wat kan maak dat mense vir ons lag nie. Ons leer van ‘n vroeë ouderdom af dat om verkeerd te wees nie goeie gevolge het nie.

Miskien het jy dit geleer toe jy op skool ‘n vraag hardop geantwoord het en die hele klas vir jou gelag het omdat jy die verkeerde antwoord gegee het. Wat was die gevolg daarvan? Waarskynlik dat jy al hoe minder jou hand in die klas opgesteek het en dat jy al hoe minder kanse begin vat het. Dit is presies wat die vrees vir verkeerd wees doen, dit inhibeer ons. Dit weerhou ons daarvan om onsself te wees en dit ontneem ons van geleenthede.

Dit tel ook vir baie van jou standpunte. Indien jy nie bereid is om verkeerd te wees nie kan jy nie groei nie. Hierdie vrees vir verkeerd wees kondisioneer ons om altyd reg te wil wees. Kyk maar in ons verhoudings. Ons is alewig besig om die vinger na mekaar te wys. Dit moet die ander ou wees wat verkeerd is want die seer van om te erken dat ek verkeerd is, is net te groot.

Sien ons nie hierdie blaamskuiwery nou in hierdie krisis onder wêreldleiers nie? Niemand wil verantwoordelikheid vat nie en elkeen het ‘n vinger wat na ‘n ander rolspeler wys. Dit maak net alles deurmekaar en ondeursigtig en eintlik help dit niemand nie.

Ek en jy, of landleiers as jy wil, kan nie iets regmaak of verander as ons nie erken dat ons verkeerd is nie. As daar een ding is wat baie duidelik geword het in die laaste paar weke, is dit dat dit wat ons as “normaal” ken, nie noodwendig die beste is nie. Daar is baie dinge wat moet verander as ons ‘n gesonde samelewing wil wees. Ons sal moet aandag gee aan die enorme ongelykheid wat bestaan in ons samelewings, so ook aan die armoede wat die grootste deel van ons mooi land in sy vieslike kloue het. Wat van ons obsessie met rykdom en sukses? Dalk die dinge waaraan ons al ons tyd bestee en die verwagtinge wat ons het van ons geliefdes?

Hoe het hierdie inperking jou verstaan wat belangrik is verander? Hoe gaan jou lewe lyk hierna? Jou grootste kans op verandering in jou lewe is eerstens wanneer jy jou vrees vir verkeerd wees in jou agtersak druk en ‘n kans vat om jou hand op te steek. En tweedens wanneer jy bereid is om jou eie foute raak te sien en te erken dat jy verkeerd is sodat jy dit kan regmaak.

Ja glo dit of nie, om verkeerd te wees kan dalk net jou lewe verander. Mag jy die moed hê om die waarheid te omarm.

Ghisnene Müller – Verwoerdpark Gemeente.

Hoe moedeloos raak jy as jy daaraan dink dat Lockdown sou more klaar gemaak het, maar nou? Nou moet ons NOG twee weke uithou. En as jy nou vir een oomblik dink dat “hey, ek is deur 21 dae, wat is nog 14?” wil ek jou net herinner dat die moeilikste deel voorlê. Die irritasie vlakke is teen hierdie tyd so 150%, die eensaamheid en verlange trek al op 200% en dan praat ons nie van die gevoel wat jy kry as jy dink jy moet alweer gaan skottelgoed was of kosmaak nie. En dan is daar nog twee weke hiervan oor.
Dalk droom jy oor wat jy alles gaan doen as jy nie meer gevangene in jou eie huis is nie, dalk gaan jy jou beste vriende nooi vir ‘n braai, dalk gaan die kinders vir ‘n naweek na ouma toe, dalk gaan jy sommer met vakansie. Dit maak nou nie saak nie, die idee is dat elkeen van ons al gedink het dat dit wat wag na alles verby is, soveel beter gaan smaak.

Maar dink aan al die voordele wat so ‘n lang tyd van afsondering vir jou kan hê?
1. Jy is waarskynlik nader aan die mense in jou huis, as voor Lockdown
2. Jy gaan beslis die geselskap van mense wat nie saam met jou bly nie, baie meer waardeer
3. Jy gaan onderwysers, bediendes, dokters, winkel werkers en die kerk soveel meer waardeer.
4. Die heel belangrikste, jy gaan ‘n ander verhouding hê met God. Dalk is dit dieper, dalk is dit net anders

Heb 12 gee vir ons weer die moed om hierdie “home stretch” aan te pak: Laat ons elke las van ons afgooi, ook die sonde wat ons so maklik verstrik, en laat ons die wedloop wat vir ons voorlê, met volharding hardloop, 2die oog gevestig op Jesus, die Begin en Voleinder van die geloof. Ter wille van die vreugde wat vir Hom in die vooruitsig was, het Hy die kruis verduur sonder om vir die skande daarvan terug te deins, en Hy sit nou aan die regterkant van die troon van God. 3Hou Hom voor oë wat so ‘n vyandige optrede van die sondaars teen Hom verdra het. Dan sal julle nie geestelik moeg word en uitsak nie.

So voordat jy mismoedig raak oor nog twee weke, haal asem, maak vir jou ‘n koppie tee/koffie en onthou: Hou Jesus dop, want die eind streep is amper daar.

Lorinda Schoonwinkel – South Crest Gemeente

Om ‘n reis na binne te onderneem, bring ons by die hart van ons godsdiens.
Wat is die hart van jou godsdiens?

Vir sommige is dit om volgens sekere reëls en gebooie te leef. Vir ander is dit om ‘n goeie mens te probeer word. Vir nog ander is dit die wete dat hulle gered is. Wat is dit vir jou? Dit kan en behoort te wees: Om in ‘n lewende verhouding met die Lewende Jesus te leef. Hy het opgestaan uit die dood om by jou te wees. Hy wil alles vir jou wees. As jy krag nodig het, wil Hy die Bron van jou krag wees. As jy troos nodig het, wil Hy jou verlig met sy vreugde. In jou donkerste tye wil Hy self jou lig wees.

Daarom sê Hebreërs 12:1 “Hou die oog gevestig op Jesus. Die begin en die
voleinder van die geloof.”

ST Potgieter Alberton Oos

Ek het die gedeelte die eerste keer geskryf verlede jaar toe die wêreld om ons nog redelik voorspelbaar was. Ek het dit so bietjie aangepas want dinge lyk nou ander, maar alles in alles bly die volgende ‘n feit: Maak nie saak wat jy dink nie, jou lewe is ‘n geskenk!

Soveel mense mis hierdie belangrike punt. Ja, ek weet alles is nie altyd maanskyn en rose nie en veral nou is dinge glad nie maklik nie en baie onseker maar glo my, die lewe bly ‘n wonderlike geskenk. Dit beteken ook dat hierdie lewe van jou vir God belangrik is.

Vir te lank was Christene se fokus op die ewige lewe eendag. Hierdie lewe was beskou as boos en lelik en ons moes almal hieruit gered word. Jy moes jou hart vir die Here gee sodat jy kan seker wees jy gaan hemel toe. Onthou jy nog daai predikers wat jou uit die hel uit gepreek het? Ja vir baie lank was dit ons fokus. Al wat belangrik was, was dat jy jou siel gered word. Asof God nie behae in jou vleeslike lewe het nie. Nou hoekom het hy dan hierdie vleeslike lewe gemaak?

Ek is die laaste ruk al hoe meer bewus daarvan dat Jesus ons eintlik leer dat die ewige lewe nie iets is wat net eendag gebeur nie, die ewige lewe begin nou alreeds. Jesus sê die Koninkryk van God het aangebreek! Dis wonderlike nuus. Dit beteken ons mag maar hierdie lewe geniet en voluit leef.

Die lewe is ‘n avontuur. Dit is opwindend. Ons vergeet dit baie keer. Ons raak so verstrengel in ons alledaagse gejaag na betekenis dat ons soms dit wat belangrik is mis. Ons mis dit om net te lewe. Efesiërs 5 sê ons moet die beste gebruik maak van elke geleentheid. As ek die teks lees dan hoor ek altyd die Latynse slagspreuk, Carpe Diem, wat beteken gryp die dag of in Engels, “seize the day”. Eintlik sê Paulus dit beter in Efesiërs 5 want dit is oomblikke wat baie keer die lewe die moeitewerd maak, is dit nie? Daai geleenthede wat wag dat ons dit aangryp. Die klein dingetjies in die lewe maak die lewe baie keer die moeitewerd maar dit is ook die klein dingetjies wat ons so maklik mis. Mens kan die dag aangryp maar die oomblik mis.

Miskien is dit een van die lesse wat hierdie krisis ons leer. Ja ons kan nie alles doen wat ons sou wou nie en daar is baie dinge wat ons bekommerd maak maar vir die eerste keer in ‘n lang tyd kry ons die kans om juis die klein dingetjies in die lewe te doen en om die oomblikke aan te gryp. Soos om tyd met ons geliefdes te deel, ons kinders te help met huiswerk, ‘n boek te lees, iets te bak of brou en sommer net ‘n klein bietjie stadiger te lewe. Die ironie is dat, nou dat die kerke se deure toe is en hulle dienste aanlyn moes skuif, baie gesinne vir die eerste keer in ‘n lang tyd weer saam aanbid.

Hoe sal jou lewe anders lyk as jy elke dag, ook hierna, die beste maak van elke oomblik. As jy elke oomblik aangryp om vir die mense om jou, geliefdes of vreemdelinge, die gesig van Jesus te wys? Hoe sal jou lewe anders lyk as jy dit sou beskou as ‘n avontuur met moontlikehede en geleenthede om elke hoek en draai?
Ek is vandag net weer opnuut opgewonde en dankbaar oor die geskenk van die lewe.

Ghisnene Müller – Verwoerdpark Gemeente

Die Heer het opgestaan! Die Heer het waarlik opgestaan! Moenie skrik nie: Julle soek Jesus van Nasaret. Hoekom soek julle die Lewende by die dooies? Hy is uit die dood opgewek! Die Heer het opgestaan! As Christus nie opgewek is nie, is ons prediking sonder inhoud en ons geloof ook sonder inhoud. Die Heer het opgestaan! Dood waar is jou angel? Doderyk, waar is jou oorwinning? Die Heer het opgestaan! Genade, onbeskryflik groot is aan ons bewys!
Lees saam met my Johannes 20:1-18

Die liggaam van die geliefde Jesus is gesteel? Sy herken nie vir Jesus wanneer Hy met haar praat nie. Verstaan Maria en die dissipels wat hier gebeur het? Vir ‘n oomblik is daar ‘n verwarring gewees oor wat hier aan die gang is. Sy liggaam is weg! Hulle het nie werklik verstaan wat die Skrif oor Hom geskryf het nie.

Jesus is uit die dood opgewek! Dit is die opdrag wat Jesus vir Maria gee! Aan wie gee Hy die opdrag? Maria, ‘n vrou. – wie se getuienis in haar konteks nie van baie waarde is nie. God werk anders! Hier sien ons dit weer! Gaan vertel van dit wat hier gebeur het! Sy moet gaan getuig oor wat vanoggend by die graf gebeur het. Die een wie se getuienis as veel geag sou word nie – kry die geleentheid om die grootste getuienis wat daar kan wees te gaan gee.

Dalk staan ons ook binne ons eie omstandighede met COVID 19 en die wêreld wat nooit weer dieselfde gaan lyk nie, in die skoene van Maria? Voel jy ook dalk soms dat jy nie kan getuig oor die opgestane Here nie, omdat jy voel jou getuienis sal nie van waarde wees nie? Miskien is ek skaam? Miskien is ek bang oor die reaksie van die aanhoorders? Mag jy dartoe gedring word om te getuig van die grafgebeure.

Mag jy anders daaroor dink. Net dalk is dit wat iemand moet hoor! Dalk is dit jou gesin wat dit net weer moet hoor, ‘n goeie vriend, familielid of buurman. Die belangrikste van alles is, net dalk miskien moet jy dit net weer hoor! Hy sal kom en jou getuienis bekragtig, net soos wat Hy later vir Maria gedoen het. Terwyl jy dit doen, weet tog dat jou lot verander het. Die Skrif het tot vervulling gekom. Ons as volgelinge van Jesus het die voorreg om meer te verstaan as net daardie oggend.
Die opstanding van Jesus is God se nuwe begin, weer en weer. Om te glo in die opstanding van Jesus Christus is om te weet dat daar ongekende blydskap is waarin ek kan deel. Dit is om te weet dat God met my nuut begin. Dit is om te weet dat ek ewigheidswaarde het. Jesus is die opgestane Here. Hy leef tot in ewigheid . Hierdie gebeurtenis wat die lot van mense vir ewig verander het is vir my ‘n heilsgebeurtenis.

“Easter means he must be loose out there somewhere. Like the disciples, I never know where Jesus might turn up, how he might speak to me, what he might ask of me.” – Philip Yancey

Met watter verwagting leef jy vandag, so in die middel van die omstandighede waarin ons onsself bevind – of eerder met watter verwagting gaan jy hier opstaan wanneer jy hierdie stuk klaar gelees het? Mag dit die moontlikheid wees dat die Gees die verwagting in jou hart herskep, sodat jy anders as die dissipels enige oomblik enige plek Jesus se verskyning kan verwag. Die opgestane Here wat jou persoonlik ontmoet.

“Maar nou aanbid ons die opgestane Here. Nou loop Hy, slaap Hy, werk Hy, speel Hy, voel Hy, vat Hy, is Hy menslik en tasbaar tussen ons, by ons, nooit sonder ons nie”…en ons nooit sonder Hom nie. – Julian Muller

Laat toe dat Jesus, die opgestane Here jou lewe, jou kerk, jou huwelik, jou werk binne tree. Dan is jy vry, omdat die opgestane Here ook in jou opgestaan het. Ek sluit af met twee punte opgesom:
1. Jy het die opdrag om te getuig – Gaan doen dit!
2. Stel jouself in met die verwagting dat die opgestane Here jou lewe betree het. Hoeveel anders lyk jou lewe nie? “Ek behoort aan die Here. Niks sal my ooit van Hom kan skei. Met sy kosbare bloed het Hy my vrygekoop dis my anker, my vaste hoop. Die doop is die seël dat die Heilige Gees my ‘n kind van God, die Vader laat wees…Ek behoort aan die Here. Niks sal my ooit van Hom kan skei.” – Lied 292

Daarom kan ons ook saam met Hom leef. Staan in Maria se skoene en sê: Ek het die Here gesien!

Ds. Deon Louw, NG Kerk Alberton-Wes