Miskien het ons nie al die antwoorde nie, Ons is dalk onseker oor wat more gaan gebeur. Ons word gekonfronteer met ‘n klomp emosies, wat soms moeilik is om te beheer.
Ons almal wil graag braaf wees, ons almal wil graag wys dat ons iets beteken. Mens word baie aangemoedig om sterk te staan en aan te gaan. Moet tog net nie vir mense wys dat jy swak is nie.

Om braaf te wees en om sterk te staan is baie goeie eienskappe om te hê, maar soos Brené Brown dit stel. Ons kan nie braaf wees sonder om bereid te wees om broos te wees nie. Sy verwys daarna dat ‘n mens nie goeie en brawe dinge kan doen as jy nie bereid is om op te daag en jouself bloot te stel aan ‘n klomp goed wat ons probeer vermy, soos die feit dat jy na alle waarskynlikheid kan misluk, kan seerkry, teleurgstel kan wees en ‘n klomp ander dinge. Al hierdie dinge maak dat ons eerder niks doen nie, eerder wegbly, want die kans vir mislukking is te groot.

Volgens Brené beteken dit nie mens moet wen en dan was jy braaf nie. Dit beteken nie jy moes alles regkry sodat mense kan sê: Kyk net sterk is daardie persoon nie. Om braaf te wees is om op te daag en te sê ek gaan probeer, ek weier om moed op te gee al is alles teen mense gekant, al is ‘n mens vreesbevange. Die bereidheid om elke dag op te staan en te kies om te leef, te kies om op te daag.

Ons is onseker en ons gaan deur geweldig baie emosies, maar as kinders van die Here kan ons weet, ons hoef nie perfek te wees nie, ons hoef nie altyd al die antwoorde te hê nie. Ons kan opdaag, want die God van die Heelal is by ons. As ons die Bybel lees dan roep die Here ‘n klomp mense wat op die ou end ‘n geweldige impak het waar hulle is en mens sien daardie mense baie keer as helde. Ons vergeet wel dat die meeste van die mense wat God roep nie perfek is nie, inteendeel hulle is die laaste mens wat iemand sal uitkies om die taak te doen, maar God doen groot dinge deur hulle.

Kyk maar net vir koning Dawid. Hy is ‘n goeie voorbeeld, Hy was maar ‘n skaapwagter, die jongste van al sy broers en God kies hom. Hy word beskou as die magstigste koning wat regeer het in Israel maar hy het so baie foute gehad. Hy het geweldig baie misluk. Hy was alles behalwe perfek.

Wat maak mense suksesvol, mense wat in die Bybel ‘n groot verskil gemaak het? Hulle was bereid. Hulle het opgedaag en die Here het die werk gedoen. Dit was Dawid se liefde vir God wat hom ‘n goeie koning gemaak het. God was by Hom. So kan ons so baie mense opnoem. Moses, Josef, Gidoen, Josua, Jesaja, Job en nog vele meer.

Ons lewe is onseker, maar ons is in die hande van die Here. Al wat ons nodig het is om op te daag, bereid te wees, tenspyte van ons broosheid, dan het ons klaar gewen.

Elana Dreyer- NG Brackendal

Wanneer mens die evangelies lees sien jy ‘n ongelyke wêreld. Die Jode het byvoorbeeld nie veel van die Samaritane gedink nie, mense met aansteeklike siektes was uit die gemeenskap uitgeskuif, vrouens was ondergeskik aan mans, kinders het nie werklik ‘n stem gehad nie, daar was baie armoede en mense wat nie die wet nagekom het nie, was op neergekyk. Dis maar hoe dit hier by ons ook lyk, is dit nie? Kyk bietjie wie is die mense wat die mag het en wie is die belangrikes. Dit is die rykes, die geleerdes, die invloedrykes en die wat polities reg verbind is. In tweeduisend jaar het baie dinge nie verander nie, het dit?

Jesus, soos wat hy dikwels gedoen het, kom draai dinge egter op hulle koppe. Hy leer Sy dissipels dat die wat eerste is sal laaste wees en die wat laaste is sal eerste wees en dat die belangrikes onder hulle die ander moet dien. Dit het nie sin gemaak vir die mense in Jesus se tyd nie en dit maak vir seker nie sin ons wêreld nie, doen dit? Ons is eintlik baie gefokus op status en stand en ons behandel mense daarvolgens. Ons praat anders met die vrou wat by die Spar werk as wat ons met ons huisdokter of die dominee praat.

Maar Jesus is anders. Wanneer mens na Sy lewe kyk, sien mens duidelik dat Hy sy eie lewe volgens hierdie waardes wat hy vir sy dissipels leer, inrig. In die eerste plek is dit hoe Hy in hierdie wêreld uitkom. Hy word gebore in ‘n stal as ‘n weerlose baba. Wanneer Hy dissipels kies, kies hy nie die bestes nie. Nee, Hy kies nie eers die tweede bestes nie! Hy kies die wat nooit eers andersins ‘n kans sou gestaan om ‘n dissipel te wees nie. Wanneer Hy dan homself met mense meng is dit die uitgeworpenes, die mense wat deur ander vermy word, die armes, die wat nie vreeslik godsdienstig is nie, die magteloses… siekes, vrouens, kinders en sondaars.

Ek wonder hoeveel kyk ons onbewustelik na ander en dink “Dankie tog ek is nie soos hy of sy nie? Dankie tog ek bly nie daar nie of my kinders is nie soos hulle kinders nie”. Miskien doen ons die teenoorgestelde net so gereëld: “Ek wens ek soveel geld gehad soos hy” of “Ek wens ek was so suksesvol soos sy”.

Gelukkig kyk Jesus so anders na ons. Dit gaan nie oor of ons ryk, suksesvol, slim of invloedryk is wat tel nie. Jesus sê dit is ‘n leun as ons onsself óf ander mense se waarde baseer op hierdie goed. Ons waarde is te vinde in die eeue oue waarheid dat ons, elkeen van ons, in die beeld van God geskep is. Hoe ongelooflik is dit nie? Niks kan tog hiermee vergelyk of beter wees as dit nie, kan dit? Jy is ongelooflik belangrik, nie omdat jy oulik, suksesvol, ryk, slim of invloedryk is nie, maar omdat God jou gemaak het. Hoe wonderlik is dit om te weet dat Jesus op díe manier na ons kyk? Dit is wel ook belangrik om te onthou dat Jesus ook na ander mense op die manier kyk, selfs die wat jy nie van hou of mee saamstem nie. Dit dring ons om met Jesus se oë na die mense om ons te kyk.

Hoe wonderlik sal hierdie wêreld nie wees as ons met Jesus se oë na onsself en na ander om ons kan kyk nie!

Ghisnene Müller – Verwoerdpark Gemeente

Het jy al die gevoel gehad van magteloosheid, moedeloosheid, ontreddering, weerloos, vrees, blootgestel? Jy sit dalk vandag in die ervaring van die COVID-19 en die grendelstaat met daardie gevoel. Waar gaan alles heen? Wat gaan van ons word? Hoe klink die gemiddelde gesprek in my huis of as ek oor die foon met vriende en familie gesels?
Om sommer net ‘n paar oomblikke vanuit ons eie geskiedenis te noem wat ook hierdie gevoel op ons harte en die mense voor ons se lewens gelaat het:
Anglo-Boere Oorlog 1899-1902
Die Spaanse Griep
Die groot Depressie 1930’s
Die uitbreek van die Tweede Wêreldoorlog
Opstande oor verkeie plekke in Suid-Afrika 1960’s tot in die 1980’s
Hier is maar om net ‘n paar te noem

Kom lees saam met my…
Jeremia 29:4-7
Ballingskap. Wat presies is dit? Ons hoor heel dikwels hierdie woord wanneer ons met die Ou Testament besig is. Ballingskap is die verwysing na die Babiloniers van die Babiloniese Ryk wat Jerusalem verwoes het en die volk in ballingskap weggeneem het. Dit is die gebeurtenis en simbool van onderdrukking van God se volk. Totale vernedering van die volk. Alles wat vir hulle belangrik was is van hulle gestroop.
Ons bevind onsself vandag in die jaar 598vC. Al die hooggeplaastes sowel as die nuwe koning word weggevoer in ballingskap. Valse profete kondig aan dat dit alles net van korte duur sal wees dan keer alles weer terug soos ons dit ken. Gaan die lewe weer lyk soos ons dit geken het? Jeremia voel baie sterk hieroor dat dit nie die geval is nie en skryf ‘n brief aan die ballinge om hierdie vals hoop in die kiem te smoor.
Julle moet huise bou, daarin woon, julle moet tuine uitlê en daarin plant, julle moet trou en kinders hê. Vestig vir julleself ‘n gemeenskap van opbou, want die ballingskap gaan lank duur. 70jaar om presies te wees. Tweedens moet julle bid vir die voorspoed en die seen van die stad. Waarom op aarde sou hulle dit moet doen? Babel se voorspoed sal ook julle voorspoed wees.

Dan hier by vers 11 – doen net dit en wees daarvan oortuig en weet dit seker dat die Here vir julle goeie beloftes inhou. Voorspoed, ‘n toekoms, ‘n verwagting. Die seen van God se kinders is vir Hom belangrik.
Vreemdelinge? Die volk van God is hier op ‘n plek waar hulle as die vreemdelinge beskou word. Begin ons nie dak in ons eie omstandighede met die COVID-19 pandemie en die grendelstaat nie ook soos vreemdelinge voel nie? Dit wat vir hulle belangrik was is van hulle af weggeneem. Voel dit nie dalk soms so dat jy die vreemdeling is nie? Gestroop van dit wat vir jou belangrik is. Die voorreg om vry rond te kan beweeg, by familie en vriende te kan kuier. In die winkels rond te loop. Om kerk toe te kan gaan. Dink bietjie hieroor: Wat is vir jou belangrik gewees en waarom is dit vir jou belangrik gewees?
Veranderinge. Verandering is seker naas die dood die ding in die lewe waarvan ons almal kan seker wees. As ons na ons eie omstandighede kyk en hoe dit in ‘n oogwink verander. Vandag is die wêreld soos ons haar ken nog vry en die volgende oomblik moet ons soek na ‘n nuwe normal. ‘n Normaal van beperkings, in ons huise bly, maskers, BAIE hande was en sosiale afstand hou.

Die gevoel van ontreddering kry my beet deur dit wat aan die gebeur is in die wêreld, die land, in my huisgesin, in my eie lewe. Wat gaan ons maak?
Babilon, wat moet ons daar maak? Bou en bid. Shalom, die volheid van God se seen. Die Shalom van Babilon. Die shalom van my en jou lewe as gelowiges. Waaroor gaan dit? Werk aan jou eie verhouding met God. Ons het nou die tyd daarvoor. Ons as gelowiges het die voorreg om in hierdie tyd te kan stil word en ons kan werk aan ons verhouding met God en om te fokus op waarmee is ons besig en hoekom? Daar gaan weer tyd kom vir nuut begin. Sien jy kans? Die bevryding uit hierdie ballingskap lê in die BOU en BID in die midde van ons omstandighede – om geestelik ook te verdiep. Dit lê in die volharding van die hoop, selfs in die donker tye.

Gaan jy ‘n punt daarvan maak om anders hieroor te dink? Wat gaan jy anders doen?
“Ek hou vas aan u troue liefde, oor die uitkoms wat U gee, juig my hart. Ek wil sing tot eer van die Here, omdat Hy aan my goed gedoen het.” – Psalm 13

Ds. Deon Louw, NG Kerk Alberton-Wes

Mens kan nie net altyd die Here loof nie. Soms is mens net te seer, te rou, te kwaad, te skuldig, te in twyfel, te omvou in die donker wolke van pyn en verlies om die Here te loof. Dan het jy nie ‘n voorsanger-lofleier nodig wat vir jou sê jy moet ‘n smile op jou gesig sit nie. Dis ook dan wat jy eerder iewers wegkruip van mense met hulle lastige maklike antwoorde en goedbedoelde rate wat baie keer soos messteke net jou pyn vererger. Soms skrik jy selfs vir jou eie Godslasterlike gedagtes wat jy om die dood toe nie kan wegkry nie sodat jy vol skuld God se teenwoordigheid probeer ontvlug soos Dawid in Psalm 139:7, “waarheen sou ek gaan om u Gees te ontvlug? “

Dan is dit soos ‘n ligstraal in die donker van mens se siel as jy weet dat die Here ook ruimte gemaak het vir jou met daardie gevoelens en dat Hy glad nie van jou verwag om Hom teen wil en dank te loof nie. Inteendeel, Hy het ook juis vir ons hierdie reaksies gegee sodat ons onsself gesond kan kla en treur en Hom weer by ons in ons hooploosheid kan vind. Hoor ons nie Jesus langs ons roep: “ My God, My God, waarom het U My verlaat?”

Hierdie gebed van die Here aan die kruis kom woordeliks uit Psalm 22, ‘n klaaglied. Ongeveer twee derdes van alle Psalms is deel van ‘n groepering Psalms wat bekend staan as klaagliedere. Een hele boek in die Bybel, Klaagliedere van Jeremia, is niks anders as ‘n lang klaaglied oor Israel se groot verlies nie. In hierdie liedere en gebede vind ons ons intensste emosies van stryd en angs opgeneem in God se woord en daarmee in sy hart.

Nooi die Here nie hiermee vir ons in sulke tye van stres en nood om ons klaagliedere by Hom te sing nie? En as ons dan woorde en selfinsig in ons eie gevoelens soek, vind ons dit hier. En terwyl mens dan in hoop teen hoop na God soek, “soos ‘n wildsbok smag na waterstrome” (Ps.42:2), en jou klagtes en wanhoop na Hom neem begin jy onthou wie God is en wat Hy in die verlede gedoen het. So mag dit ons, soos in Psalm 42, neem na God met ons wat nog altyd dieselfde is en na nuwe hoop.

4 Dag en nag is ek in trane, want sonder ophou sê hulle vir my:
“En waar is jou God nou?”
5 As ek my lewe voor my laat verbygaan, dink ek daaraan
hoe ek opgetrek het na die woonplek van God,
voor ‘n skare uit na sy huis toe geloop het
met gejuig en lofsang – ‘n skare wat feesvier.
6 Waarom is ek so in vertwyfeling en waarom kerm ek so?
Vertrou op God!
Ja, ek sal weer vir Hom ‘n loflied sing.
Hy is my helper en my God! (Psalm 42)

Piet Botha- Brackendal

Hierdie is nou week 4 van grendeltyd. En dit voel kompleet of die Grendel te styf geslot is. Pyn en swaarkry glip uit soos n drukkoker wat net nie alles kan binnehou nie! Huwelike haak uit, gesin-spanning is te hoog, kort van draad maak dat uitvliete gebeur. En dan klop daar dinge aan ons deur, eksterne druk soos die vermindering van inkomste, werkloosheid en so voorts.

Ek merk in Openbaring dat die sewe briewe aan gemeentes vertel van swaarkry – gelowiges kry swaar – tog is dit nie die saak wat die Here aanspreek nie. Hy bied baie troos, hulp en teenwoordigheid aan. Maar is bekommerd oor ons geestelike welstand. Lees elke brief: “Ek het dit teen julle dat… “ en dan handel dit oor hul geestelike diepte en groei.

Ons geestelike gesondheid is primêr; swaarkry kan ons hanteer. Let op hoe die Here ons leer bid het:…“Laat U wil geskied hier by ons op die aarde soos wat U wil geskied in die hemel!” Ons geestelike welstand moet wees soos in die hemel.

Wat gebeur in die hemel? Waar moet ons fokus wees? – Openbaring 4 vertel van “soos in die hemel”: God sit op Sy troon (totale HEERskappy) Die stene en kristal vertel van Sy grootheid … en die reënboog lei ons gedagtes na die verbond met Noag; dat God beloof het Hy sal ons nie uitwis nie.

Let op wat vertel Openb 4 van die Kerk; dit is ek en jy nou en almal wat glo van alle tye en plekke (OT en NT) hulle is in n sirkel rondom Sy Troon – ewe vêr van God af (ewe belangrik, met God die belangrikste) almal in wit geklee (vry en rein) met krone. En die Heilige Gees in die vorm van sewe lampe … Die hele skepping is daar: wilde diere, mak diere, mens en voëls en hulle roep uit dat God die belangrikste is: En ons (Kerk) reageer op hierdie oproep met n lied wat al die eer net aan God gee.

Dink so wyd as wat jy kan- toer deur die hele Nuwe Testament – besef jy die christene het altyd swaar gekry, maar hulle het nooit gekla nie, hoekom nie? Want … hulle het God op Sy Troon sien sit… Lees die hele Openbaring, Romeine 8, dink aan Paulus-hulle in die tronk, besig om lofliedere te sing. Die kerk het nooit gekla nie, net vir God aanbid, want hulle het God gesien.

Dit is wat ons, wat swaarkry, dra: Met geloofsoë sien ons God in die hemel, op Sy Troon. Terwyl ons bid “Laat U wil geskied soos in die hemel netso op ons aarde” Daar is ons troos en ons ware Noord. CS Lewis, n beleefde teoloog het gesê: “Mense wat die hemel gesien het, maak hierdie wêreld anders.” Sterkte vir die vyfde week.

Baie keer net mooi in die teenoorgestelde rigting waarin die massamedia ons lei. Die massamedia is ‘n glanswêreld waarin mense blink gevryf en versorg is. Droomvroue en -mans. As die aantreklike verliefdheid verby is, kom jy agter dat jou huweliksmaat ook maar iemand van vlees en bloed is , met foute en tekortkominge. Dis dan wanneer ons begin om mekaar te probeer verander. Jy voel ingehok en onvry. Jy wil die ander een regsnoei om na jou behoeftes te pas. Wat tel is nie hulle aard nie maar jou behoefte. Dalk ken jy die gevoel om ingeperk te wees en nie jouself te kan wees nie.

God wys vir ons hoe ware liefde lyk. Hy sê vir Israel “Ek het jou liefgekry, nie omdat jy so wonderlik is nie. Jy was die kleinste van al die volke (Deutr:7:7). God se liefde hok my nie in nie, maar maak my vry en vertrou my. Hy skep ruimte om my volle potensiaal te onwikkel.

ST Potgieter – Alberton Oos

Jeremia 31:25 sê Ek gee nuwe krag aan dié wat moeg is, Ek maak die moedelose weer vol moed.

Paasfees voel alklaar of dit ‘n ligjaar weg is. Ons is nogsteeds vasgevang in hierdie selfde vier mure met geen idee wanneer dit gaan eindig nie. En dit maak ons moedeloos. Maar as ons vir een oomblik kan rewind. Waar dink jy was Jesus se gedagtes op Goeie Vrydag? Hy het 13 keer gepraat daardie dag. 10 van hulle wat met of oor God. 80% van sy dag was op die hemel gerig. Jesus het heel dag lank God op sy lippe gehad.
So volgende keer as jy moedeloos voel, doen die wiskunde. Vat God 80% van jou gedagtes op? Is 80% van dit wat jy doen op die hemel gerig? Dalk wil God hê jy moet bietjie meer aan Hom dink.

Dalk in stede daarvan om moedeloos te raak, kan jy eerder jou gedagtes op God rig. Wanneer jou gesondheid jou in die steek laat of probleme jou vreugde steel, vat ‘n breek van hulle. “Rig julle gedagtes op die dinge wat daarbo is, nie op die dinge wat op die aarde is nie, 3want julle het gesterwe, en julle lewe is saam met Christus verborge in God.” (Kol 3:2)

Christus kan enige moedelose dag verander in ‘n God-gevulde dag, dit hang net van jou af. Is jy bereid om hierdie dag ‘n kans te gee en met nuwe oë daarna te kyk?

Lorinda Schoonwinkel – South Crest Gemeente

Galasiers 5: 1
Christus het ons vrygemaak om werklik vry te wees. Staan dan vas in hierdie vryheid en moet julle nie weer onder ‘n slawejuk laat indwing nie.

Wat beteken dit vir ‘n kind van die Here wanneer hy of sy hoor dat hy werlklik vry is?
God het gekom om vir ons vryheid te kom gee. Dit beteken egter nie noodwendig dat ons vry is van al die verskriklike dinge waarmee ons gekomfronteer word in die wêreld nie. Dit beteken nie dat ons nooit pyn en lyding sal ervaar nie. Ons is nie gevrywaar van gevare nie.

Hierdie vryheid is ‘n ten spyte van vryheid. Dis vryheid omdat ons as kinders van God weet, ten spyte van al die pyn en lyding van die wêreld, ten spyte van my omstandighede, ten spyte van siekte en dood kan ek steeds vrede hê, kan ek steeds vreugde ervaar, kan ek weet dat hierdie dinge nie my identiteit, my waarde bepaal nie. Die rede? Want jy is ‘n kind van God. Dit beteken dat al gebeur enige iets met jou, jy is veilig by God. Al is my omstandighede hoe sleg, God is by my en nie eers die dood kan ons skei van sy liefde nie.
God het ons nie kom vry maak sodat ons nie die laste van die wêreld hoef te beleef nie, inteendeel Hy sê dat ons vervolg sal word. God het ons kom vry maak van ons sonde sodat ons nie meer gedefinieer hoef te word deur ons sonde, deur ons pyn nie. Ons is kinders van God en omdat ons kinders van God is, kan ons deur enige iets kom.

God sê vir ons dat hy by ons is selfs al gaan ons deur donker dieptes soos in Psalm 23 staan, is Hy steeds by ons.
Ons is in die middel van ‘n pandemie, en dit gaan gepaard met ‘n klomp emosies, dalk kwaad, dalk vrees, dalk vrees dat die mense wat ek liefhet iets mag oorkom en ek kan nie by hulle wees of uitkom nie. God kom en sê vir ons dat ons onsself en ons naasbestaandes, die wêreld in Sy hande kan plaas en weet dat ons in die beste hande moontlik is. Ons kan vrede vind in die feit dat God ons werklik liefhet, en al sou ons iets oorkom is ons vry en veilig in God se hande. Ons as kinders van God kan ‘n verskil maak, want ons weet al gebeur wat okal met my, God is met jou.

Jy is seker, soos baie ander mense op ‘n plek waar jy dalk erg moedeloos is. Jy is dalk op ‘n plek waar die angstigheid in jou gemoed baie hoog is in vergelyking met voor die algehele afsondering. Jou lewe is teen hierdie tyd al op verskeie maniere direk geraak deur die impak van COVID-19. Ekonomies, geestelik, fisies en iemand na aan jou of jy is dalk gediagnoseer. Jy is nagte wakker omtrent hoe ons weer die stukke van impak hierdie gebeurtenis gaan optel. Moedeloos. Wel, daar is dalk iemand se verhaal wat jou kan bemoedig en inspireer.
Lees saam met my…

Lukas 24:13-35
Die twee Emmausgangers is oppad terug huistoe. Daar is groot skok, hartseer en teleurstelling – ‘n moedeloosheid in hulle harte. Dit is baie duidelik dat hulle volgelinge van Jesus was en saam met Hom geleef het. Nou is Hy dood. Dit is nie al nie. Nou is dit so dat Jesus se liggaam nie meer in die graf is nie. Die hoop wat hulle gehad het is finaal weg.

Daar is die verwagting van Jesus se volgelinge gewees dat Hy die Messias gaan wees. Hy is die een wat Israel gaan verlos. God het ‘n ander plan gehad met Sy verlossingsplan. Die doel voor oë is gewees om mense met Hom te versoen. Daarom het niks van die gebeure die afgelope tyd in Jerusalem vir hulle sin gemaak nie.
Dit is baie interessant dat iemand wat saam met Jesus geleef het, Hom nie herken wanneer hulle Hom op die pad ontmoet nie. Die passiewe vorm word hier gebruik – wat daarop neerkom dat die Emmausgangers die onvermoë het om te sien wie saam met hulle loop. Jesus noem dit dat hulle ‘n gebrek aan begrip het oor wie Hy is, en oor wat werklik in Jerusalem gebeur het. Sien julle dit nie raak nie. Dit alles waarvan daar vertel word deur die eeue heen het tot vervulling gekom.

Hierdie reis waarop hierdie twee mense is, is nie iets buitengewoons nie. Dan is daar hierdie vreemdeling wat saam met hulle kom stap. Hy vra nie om by hulle oor te bly vir die aand nie. Hy maak of Hy verbygaan.

Hulle nooi dan hierdie vreemdeling om by hulle oor te bly. Dan gebeur die vreemdste ding. Hierdie vreemdeling tree op as die gasheer en nie die gas nie. Is daar dalk ‘n verbintenis tussen die laaste paasmaaltyd. Daarom herken hulle Hom?

Jesus word die gasheer in die huis van die Emmausgangers en hulle die gaste? Jesus sit saam met hulle en eet. Toe Hy die brood breek besef hulle wie Hy is. Stephan Joubert skryf dat dit hier is waar die grootste teleurstelling in die grootste geleentheid verander het. Mag jou teleurstelling, moedeloosheid, bekommernis en hartseer in ‘n geleentheid verander wanneer Jesus weer die gasheer in jou lewe word. Jy het dalk self siek geword en ook so baie verloor, maar daar is hoop!!
Dit is hier waar die verhaal ‘n keurpunt bereik en die Emmausgangers besef, dit is die opgestane Here wat by hulle aan huis is. Hy het regtig opgestaan. Daar hardloop hulle in die donker al die pad terug na Jerusalem om die ander te gaan vertel dat Jesus werklik opgestaan het.

Wat leef in jou hart? Het die opgestane Here Jesus in jou lewe bekend geword?“ Wees stil en ondersoek in verwondering wanneer jou hart ook warm geword het. Mag daar vir jou hoop daarin wees. Hoop om vorentoe te gaan. Hoop om op te staan, hoop om te lewe. Ek sluit af met ‘n aanhaling van een van my oud-dosente
“Die verhale van die opgestane Christus vertel en getuig van hoop…Hoop ja, maar nooit besittings nie.” – Julian Muller

Wat is dit wat sal gebeur in jou lewe wanneer jy toelaat dat die opgestane Here optree as gasheer in jou lewe? Hoeveel anderste gaan jou lewe lyk? Hoeveel hoop leef daar in jou hart? Hoop op Hom en nie besittings nie?

Ds Deon Louw, NG Kerk Alberton-Wes

Dit is altyd lekker om te lees wat die Here op aarde gedoen het en vir mense gesê het. Die besef het stadig in my gegroei dat Hy altyd positief was wanneer Hy met mense besig was. Net teenoor die kerkleiers was Hy baie krities.

En toe lees ek Johannes 5 -Op die Sabbatdag… het Hy ‘n negatiewe opmerking teenoor ‘n jongman gemaak. Die man by die Bad van Betesda. Hy het vir daardie geneesde man gesê: ”Kyk, jy is nou gesond. Moet nou nie meer sonde doen nie, sodat daar nie iets ergers met jou gebeur nie.” Verbasend!

Die lam man van Betesda se lewe is vir my ‘n kontras teenoor Johannes 9 se man wat blind gebore is. Die blinde het, na hy kon sien Jesus so verdedig; hy het verskil van sy ouers en selfs opgestaan teen die kerkleiers wat Jesus wou afkraak. Jesus het sulke mooi dinge oor hom gesê, soos dat Hy (Jesus) juis aarde toe gekom het sodat mense soos hy(blinde) kon sien.

Ai en die Lam man kla oor niemand hom in die bad wil ingooi nie (alles en almal skuld hom iets). Hy kry sy bene terug, maar dan nog leef hy asof hy die “benadeelde” is en verkla hy vir Jesus by die kerkleiers. Ek sien ‘n groot verskil tussen die twee geneesdes, in hul gees en hul dankbaarheid: Die een kies om Jesus te aanbid, die ander kies om Hom te verkla.

Elkeen kan kies wat sy/haar ingesteldheid vandag gaan wees. Dat jy kan leef, kan glo, kan gesond wees, is so groot geskenk. Gebruik dan die lewe wat jy het om nie sonde te doen nie, maar om eerder met dankbaarheid God te aanbid en verkondig en groot te maak.
Kom ons kies om te lewe! Kies om te aanbid.

Phillip Coetzee – Brackenhurst Gemeente