DF Malherbe roep in sy bekende gedig: Wat is die slaap ‘n wondersoete ding!
Slaap is genadetyd en Godtyd.

Psalm 127:2: Tevergeefs dat julle vroeg opstaan en laat gaan slaap om met moeite ‘n bestaan te maak. Vir dié wat Hy liefhet, gee die Here dit in hulle slaap.
God het ons gemaak om te rus, dit is selfs in die skepping ingebou en in die skeppingsverhaal lees ons dat God die 7de dag gerus het en dit ook vir ons as Sabbat ingestel en geheilig het. Sabbat beteken om op te hou en te rus.
God doen soveel met ons in ons slaap: Hy vernuwe ons telkens na liggaam, siel en gees. Hoe dikwels ervaar ons nie soggens hoe ‘n nuwe dag ons blink en vars begroet nie. Die varsheid van die oggend het nie net met die oggend te doen nie maar ook met ons vernuwende kyk en uitsig op die wêreld om ons.

Slaap is natuurlik ook ‘n werkwoord, dis iets wat jy gaan doen. Maar dis ‘n soort paradoksale werkwoord, eintlik moet jy ophou om te doen en gaan rus. So stem dit ooreen met geloof. Geloof is om iets te doen maar om te glo moet jy eintlik ophou om op jouself en jou werke en prestasies te vertrou en jy stel jou vertroue in God. Daarom sê Psalm 127 ook in vers 1:
As die Here die huis nie bou nie, swoeg dié wat daaraan bou, tevergeefs.
As die Here die stad nie beskerm nie, waak dié wat dit beskerm, tevergeefs.

Slaap is daarom ook oorgeetyd en ‘n daad van vertroue. Jy gaan lê jou as’t ware in vertroue in die arms van God, jou Hemelse Vader. Malherbe het in sy gedig sy kind so sien aan die slaap raak: “Ek merk hoe langsaam hy genaak wat drome soet tot werklikhede maak …. in vaderarms rus my lieweling”. Dan sy wens aan die end van sy gedig: “sluit so my oë, God, as ek gaan rus.

Maar wat as die rus my ontwyk? As spanning en angs my laat rondrol en ek doodeenvoudig nie kan slaap nie of reeds te vroeg wakker lê.
Ook dit kan Godtyd wees. Psalm 16:6-9 sê: “selfs in die nag bly ek bewus van wat Hy my leer.
8 Ek het die Here altyd by my: omdat Hy by my is, sal ek nie struikel nie. Daarom is ek bly en juig ek en voel ek my veilig”

Wakkertyd is oefentyd in vertroue in die Here, word rustig in Hom en gee al jou bekommernise aan Hom. Dit is ook belydenistyd, haal rustig asem en bely jou skuld, sonde en laste met elke uitasem en dank God vir sy verhoring met elke inasem. Dit is ook dank en loftyd, laat jou gedagtes gaan na al die goeie wat God jou gegee het en dank en loof Hom daarvoor. Dis ook voorbiddingstyd waar jy vir almal en alles rondom jou kan bid. Bid die Onse Vader en bekende dele soos Psalm 23. Word dan net stil in die teenwoordigheid van God.

Slaap of wakker, dit bly genadetyd

Piet Botha – Brackendal

Die vraag waar is God in hierdie tyd, is op almal se lippe. Party beweer dat God COVID 19 oor ons gebring het, om een of ander les te leer. Ander sê weer ons is soos Job deur die duiwel versoek en ons met net vas staan in die geloof.

Maar kom ons staan net vir ‘n oomblik stil by God. Kom ons gaan raak stil en fokus op die beloftes wat God regtig vir ons gee. Nêrens in die Bybel praat dit spesifiek van COVID 19 nie, maar in die tyd wat die Bybel geskryf is, was daar ook ‘n “groot griep” of twee wat die mense baie siek gemaak het, en baie om die lewe gebring het. Hierdie is nie die wêreld se eerste pandemie nie.

So hoewel ons dalk mag voel asof ons gestraf word, of beproef word is daar ‘n paar beloftes waaraan ons kan vashou. Heb 13:5 sê vir ons “Ek sal jou nooit alleen los nie en Ek sal jou nooit in die steek laat nie”; Jes 43:1 “Ek het jou op die naam geroep, jy is myne”; Joh 14:27 “Vrede laat Ek vir julle na; my vrede gee Ek vir julle. Die vrede wat Ek vir julle gee, is nie die soort wat die wêreld gee nie. Julle moet nie ontsteld wees nie, en julle moet nie bang wees nie”. En dit is maar net om ‘n paar te noem.

In werklikheid maak dit nie saak of hierdie virus in ‘n vismark of laboratorium begin is nie, wat saak maak is dat ons nou, saam, in isolasie leef. Dat almal van ons dieselfde emosies ervaar en dat ons almal al moeg is vir ons huise. En wanneer ons so voel en ons Bybels oopslaan vir raad, moet ons nie allerhande snaakse afleidings maak nie. Hou net vas aan God se beloftes, Hy sien jou raak en Hy is oneindigend lief vir jou. Jy is Sy gunsteling mens en Hy sal jou nie in die steek laat nie.

Lorinda Schoonwinkel – South Crest Gemeente

1 Johannes 1:8-10
As ons beweer dat ons nie sonde het nie, bedrieg ons onsself en is die waarheid nie in ons nie. Maar as ons ons sondes bely – Hy is getrou en regverdig, Hy vergewe ons ons sondes en reinig ons van alle ongeregtigheid. As ons beweer dat ons nie gesondig het nie, maak ons Hom tot leuenaar en is sy woord nie in ons nie.

Een van die vereistes om na binne te reis, m.a.w om jouself beter te leer ken en om emosioneel en geestelik te groei, is om bereid te wees om te erken dat jy ook verkeerd kan wees.

Nou hoor ek jou sê: “Ja natuurlik! Almal maak foute!” maar dis nie so maklik nie want ons almal hou te veel van reg wees, is dit nie? Ek moet herken, om verkeerd te wees is vir my niks lekker nie! Ek sal soms baie dinge doen om dit te vermy maar wat sal jy daarvan dink as ek vir jou sou sê dat om verkeerd te wees ‘n gawe is. En om te kan erken jy is verkeerd kan jou lewe verander. Luister my uit.

Op ‘n redelike jong ouderdom, wanneer ons begin selfbewus word, fokus ons almeer daarop om nie foute te maak nie. Ons fokus daarop om nie iets te doen of te sê wat kan maak dat mense vir ons lag nie. Ons leer van ‘n vroeë ouderdom af dat om verkeerd te wees nie goeie gevolge het nie.

Miskien het jy dit geleer toe jy op skool ‘n vraag hardop geantwoord het en die hele klas vir jou gelag het omdat jy die verkeerde antwoord gegee het. Wat was die gevolg daarvan? Waarskynlik dat jy al hoe minder jou hand in die klas opgesteek het en dat jy al hoe minder kanse begin vat het. Dit is presies wat die vrees vir verkeerd wees doen, dit inhibeer ons. Dit weerhou ons daarvan om onsself te wees en dit ontneem ons van geleenthede.

Dit tel ook vir baie van jou standpunte. Indien jy nie bereid is om verkeerd te wees nie kan jy nie groei nie. Hierdie vrees vir verkeerd wees kondisioneer ons om altyd reg te wil wees. Kyk maar in ons verhoudings. Ons is alewig besig om die vinger na mekaar te wys. Dit moet die ander ou wees wat verkeerd is want die seer van om te erken dat ek verkeerd is, is net te groot.

Sien ons nie hierdie blaamskuiwery nou in hierdie krisis onder wêreldleiers nie? Niemand wil verantwoordelikheid vat nie en elkeen het ‘n vinger wat na ‘n ander rolspeler wys. Dit maak net alles deurmekaar en ondeursigtig en eintlik help dit niemand nie.

Ek en jy, of landleiers as jy wil, kan nie iets regmaak of verander as ons nie erken dat ons verkeerd is nie. As daar een ding is wat baie duidelik geword het in die laaste paar weke, is dit dat dit wat ons as “normaal” ken, nie noodwendig die beste is nie. Daar is baie dinge wat moet verander as ons ‘n gesonde samelewing wil wees. Ons sal moet aandag gee aan die enorme ongelykheid wat bestaan in ons samelewings, so ook aan die armoede wat die grootste deel van ons mooi land in sy vieslike kloue het. Wat van ons obsessie met rykdom en sukses? Dalk die dinge waaraan ons al ons tyd bestee en die verwagtinge wat ons het van ons geliefdes?

Hoe het hierdie inperking jou verstaan wat belangrik is verander? Hoe gaan jou lewe lyk hierna? Jou grootste kans op verandering in jou lewe is eerstens wanneer jy jou vrees vir verkeerd wees in jou agtersak druk en ‘n kans vat om jou hand op te steek. En tweedens wanneer jy bereid is om jou eie foute raak te sien en te erken dat jy verkeerd is sodat jy dit kan regmaak.

Ja glo dit of nie, om verkeerd te wees kan dalk net jou lewe verander. Mag jy die moed hê om die waarheid te omarm.

Ghisnene Müller – Verwoerdpark Gemeente.

Hoe moedeloos raak jy as jy daaraan dink dat Lockdown sou more klaar gemaak het, maar nou? Nou moet ons NOG twee weke uithou. En as jy nou vir een oomblik dink dat “hey, ek is deur 21 dae, wat is nog 14?” wil ek jou net herinner dat die moeilikste deel voorlê. Die irritasie vlakke is teen hierdie tyd so 150%, die eensaamheid en verlange trek al op 200% en dan praat ons nie van die gevoel wat jy kry as jy dink jy moet alweer gaan skottelgoed was of kosmaak nie. En dan is daar nog twee weke hiervan oor.
Dalk droom jy oor wat jy alles gaan doen as jy nie meer gevangene in jou eie huis is nie, dalk gaan jy jou beste vriende nooi vir ‘n braai, dalk gaan die kinders vir ‘n naweek na ouma toe, dalk gaan jy sommer met vakansie. Dit maak nou nie saak nie, die idee is dat elkeen van ons al gedink het dat dit wat wag na alles verby is, soveel beter gaan smaak.

Maar dink aan al die voordele wat so ‘n lang tyd van afsondering vir jou kan hê?
1. Jy is waarskynlik nader aan die mense in jou huis, as voor Lockdown
2. Jy gaan beslis die geselskap van mense wat nie saam met jou bly nie, baie meer waardeer
3. Jy gaan onderwysers, bediendes, dokters, winkel werkers en die kerk soveel meer waardeer.
4. Die heel belangrikste, jy gaan ‘n ander verhouding hê met God. Dalk is dit dieper, dalk is dit net anders

Heb 12 gee vir ons weer die moed om hierdie “home stretch” aan te pak: Laat ons elke las van ons afgooi, ook die sonde wat ons so maklik verstrik, en laat ons die wedloop wat vir ons voorlê, met volharding hardloop, 2die oog gevestig op Jesus, die Begin en Voleinder van die geloof. Ter wille van die vreugde wat vir Hom in die vooruitsig was, het Hy die kruis verduur sonder om vir die skande daarvan terug te deins, en Hy sit nou aan die regterkant van die troon van God. 3Hou Hom voor oë wat so ‘n vyandige optrede van die sondaars teen Hom verdra het. Dan sal julle nie geestelik moeg word en uitsak nie.

So voordat jy mismoedig raak oor nog twee weke, haal asem, maak vir jou ‘n koppie tee/koffie en onthou: Hou Jesus dop, want die eind streep is amper daar.

Lorinda Schoonwinkel – South Crest Gemeente

Om ‘n reis na binne te onderneem, bring ons by die hart van ons godsdiens.
Wat is die hart van jou godsdiens?

Vir sommige is dit om volgens sekere reëls en gebooie te leef. Vir ander is dit om ‘n goeie mens te probeer word. Vir nog ander is dit die wete dat hulle gered is. Wat is dit vir jou? Dit kan en behoort te wees: Om in ‘n lewende verhouding met die Lewende Jesus te leef. Hy het opgestaan uit die dood om by jou te wees. Hy wil alles vir jou wees. As jy krag nodig het, wil Hy die Bron van jou krag wees. As jy troos nodig het, wil Hy jou verlig met sy vreugde. In jou donkerste tye wil Hy self jou lig wees.

Daarom sê Hebreërs 12:1 “Hou die oog gevestig op Jesus. Die begin en die
voleinder van die geloof.”

ST Potgieter Alberton Oos

Ek het die gedeelte die eerste keer geskryf verlede jaar toe die wêreld om ons nog redelik voorspelbaar was. Ek het dit so bietjie aangepas want dinge lyk nou ander, maar alles in alles bly die volgende ‘n feit: Maak nie saak wat jy dink nie, jou lewe is ‘n geskenk!

Soveel mense mis hierdie belangrike punt. Ja, ek weet alles is nie altyd maanskyn en rose nie en veral nou is dinge glad nie maklik nie en baie onseker maar glo my, die lewe bly ‘n wonderlike geskenk. Dit beteken ook dat hierdie lewe van jou vir God belangrik is.

Vir te lank was Christene se fokus op die ewige lewe eendag. Hierdie lewe was beskou as boos en lelik en ons moes almal hieruit gered word. Jy moes jou hart vir die Here gee sodat jy kan seker wees jy gaan hemel toe. Onthou jy nog daai predikers wat jou uit die hel uit gepreek het? Ja vir baie lank was dit ons fokus. Al wat belangrik was, was dat jy jou siel gered word. Asof God nie behae in jou vleeslike lewe het nie. Nou hoekom het hy dan hierdie vleeslike lewe gemaak?

Ek is die laaste ruk al hoe meer bewus daarvan dat Jesus ons eintlik leer dat die ewige lewe nie iets is wat net eendag gebeur nie, die ewige lewe begin nou alreeds. Jesus sê die Koninkryk van God het aangebreek! Dis wonderlike nuus. Dit beteken ons mag maar hierdie lewe geniet en voluit leef.

Die lewe is ‘n avontuur. Dit is opwindend. Ons vergeet dit baie keer. Ons raak so verstrengel in ons alledaagse gejaag na betekenis dat ons soms dit wat belangrik is mis. Ons mis dit om net te lewe. Efesiërs 5 sê ons moet die beste gebruik maak van elke geleentheid. As ek die teks lees dan hoor ek altyd die Latynse slagspreuk, Carpe Diem, wat beteken gryp die dag of in Engels, “seize the day”. Eintlik sê Paulus dit beter in Efesiërs 5 want dit is oomblikke wat baie keer die lewe die moeitewerd maak, is dit nie? Daai geleenthede wat wag dat ons dit aangryp. Die klein dingetjies in die lewe maak die lewe baie keer die moeitewerd maar dit is ook die klein dingetjies wat ons so maklik mis. Mens kan die dag aangryp maar die oomblik mis.

Miskien is dit een van die lesse wat hierdie krisis ons leer. Ja ons kan nie alles doen wat ons sou wou nie en daar is baie dinge wat ons bekommerd maak maar vir die eerste keer in ‘n lang tyd kry ons die kans om juis die klein dingetjies in die lewe te doen en om die oomblikke aan te gryp. Soos om tyd met ons geliefdes te deel, ons kinders te help met huiswerk, ‘n boek te lees, iets te bak of brou en sommer net ‘n klein bietjie stadiger te lewe. Die ironie is dat, nou dat die kerke se deure toe is en hulle dienste aanlyn moes skuif, baie gesinne vir die eerste keer in ‘n lang tyd weer saam aanbid.

Hoe sal jou lewe anders lyk as jy elke dag, ook hierna, die beste maak van elke oomblik. As jy elke oomblik aangryp om vir die mense om jou, geliefdes of vreemdelinge, die gesig van Jesus te wys? Hoe sal jou lewe anders lyk as jy dit sou beskou as ‘n avontuur met moontlikehede en geleenthede om elke hoek en draai?
Ek is vandag net weer opnuut opgewonde en dankbaar oor die geskenk van die lewe.

Ghisnene Müller – Verwoerdpark Gemeente

Die Heer het opgestaan! Die Heer het waarlik opgestaan! Moenie skrik nie: Julle soek Jesus van Nasaret. Hoekom soek julle die Lewende by die dooies? Hy is uit die dood opgewek! Die Heer het opgestaan! As Christus nie opgewek is nie, is ons prediking sonder inhoud en ons geloof ook sonder inhoud. Die Heer het opgestaan! Dood waar is jou angel? Doderyk, waar is jou oorwinning? Die Heer het opgestaan! Genade, onbeskryflik groot is aan ons bewys!
Lees saam met my Johannes 20:1-18

Die liggaam van die geliefde Jesus is gesteel? Sy herken nie vir Jesus wanneer Hy met haar praat nie. Verstaan Maria en die dissipels wat hier gebeur het? Vir ‘n oomblik is daar ‘n verwarring gewees oor wat hier aan die gang is. Sy liggaam is weg! Hulle het nie werklik verstaan wat die Skrif oor Hom geskryf het nie.

Jesus is uit die dood opgewek! Dit is die opdrag wat Jesus vir Maria gee! Aan wie gee Hy die opdrag? Maria, ‘n vrou. – wie se getuienis in haar konteks nie van baie waarde is nie. God werk anders! Hier sien ons dit weer! Gaan vertel van dit wat hier gebeur het! Sy moet gaan getuig oor wat vanoggend by die graf gebeur het. Die een wie se getuienis as veel geag sou word nie – kry die geleentheid om die grootste getuienis wat daar kan wees te gaan gee.

Dalk staan ons ook binne ons eie omstandighede met COVID 19 en die wêreld wat nooit weer dieselfde gaan lyk nie, in die skoene van Maria? Voel jy ook dalk soms dat jy nie kan getuig oor die opgestane Here nie, omdat jy voel jou getuienis sal nie van waarde wees nie? Miskien is ek skaam? Miskien is ek bang oor die reaksie van die aanhoorders? Mag jy dartoe gedring word om te getuig van die grafgebeure.

Mag jy anders daaroor dink. Net dalk is dit wat iemand moet hoor! Dalk is dit jou gesin wat dit net weer moet hoor, ‘n goeie vriend, familielid of buurman. Die belangrikste van alles is, net dalk miskien moet jy dit net weer hoor! Hy sal kom en jou getuienis bekragtig, net soos wat Hy later vir Maria gedoen het. Terwyl jy dit doen, weet tog dat jou lot verander het. Die Skrif het tot vervulling gekom. Ons as volgelinge van Jesus het die voorreg om meer te verstaan as net daardie oggend.
Die opstanding van Jesus is God se nuwe begin, weer en weer. Om te glo in die opstanding van Jesus Christus is om te weet dat daar ongekende blydskap is waarin ek kan deel. Dit is om te weet dat God met my nuut begin. Dit is om te weet dat ek ewigheidswaarde het. Jesus is die opgestane Here. Hy leef tot in ewigheid . Hierdie gebeurtenis wat die lot van mense vir ewig verander het is vir my ‘n heilsgebeurtenis.

“Easter means he must be loose out there somewhere. Like the disciples, I never know where Jesus might turn up, how he might speak to me, what he might ask of me.” – Philip Yancey

Met watter verwagting leef jy vandag, so in die middel van die omstandighede waarin ons onsself bevind – of eerder met watter verwagting gaan jy hier opstaan wanneer jy hierdie stuk klaar gelees het? Mag dit die moontlikheid wees dat die Gees die verwagting in jou hart herskep, sodat jy anders as die dissipels enige oomblik enige plek Jesus se verskyning kan verwag. Die opgestane Here wat jou persoonlik ontmoet.

“Maar nou aanbid ons die opgestane Here. Nou loop Hy, slaap Hy, werk Hy, speel Hy, voel Hy, vat Hy, is Hy menslik en tasbaar tussen ons, by ons, nooit sonder ons nie”…en ons nooit sonder Hom nie. – Julian Muller

Laat toe dat Jesus, die opgestane Here jou lewe, jou kerk, jou huwelik, jou werk binne tree. Dan is jy vry, omdat die opgestane Here ook in jou opgestaan het. Ek sluit af met twee punte opgesom:
1. Jy het die opdrag om te getuig – Gaan doen dit!
2. Stel jouself in met die verwagting dat die opgestane Here jou lewe betree het. Hoeveel anders lyk jou lewe nie? “Ek behoort aan die Here. Niks sal my ooit van Hom kan skei. Met sy kosbare bloed het Hy my vrygekoop dis my anker, my vaste hoop. Die doop is die seël dat die Heilige Gees my ‘n kind van God, die Vader laat wees…Ek behoort aan die Here. Niks sal my ooit van Hom kan skei.” – Lied 292

Daarom kan ons ook saam met Hom leef. Staan in Maria se skoene en sê: Ek het die Here gesien!

Ds. Deon Louw, NG Kerk Alberton-Wes

Met die herdenking van Goeie Vrydag het die gedagte by my opgekom, dat die omstanders by die kruis, hetsy die soldaat met sy belydenis, die vroue wat gestaan en huil het of enige ander toeskouers .… nie vir altyd daar bly staan het nie. Die kruis was ‘n kernmoment in elkeen van hul se lewe daarna, maar op daardie oomblik moes hulle omdraai en teruggaan na hul ou lewens toe. Dieselfde gedagtegang kry ons in die verhaal van die Emmausgangers (Luk 24:13-35) – mense wat heel verslae wegstap van die Goeie Vrydag gebeure.

Hulle het nie dieselfde weggestap nie. Hulle was nie meer dieselfde mense as vantevore nie. Hulle was nie meer Donderdag mense nie. Maar Goeie-Vrydag mense. En op daardie oomblik, was hulle wêrelde werklik uitmekaar geskeur. Want op daardie Vrydag was Jesus werklik dood. Hulle sou nie soos ons moderne lesers die storie vooruit kon lees en weet dat daar ‘n Sondagmôre met ‘n leë graf sou wees nie. Hulle was regtig verslae. Hulle het nie meer geweet hoe om na die toekoms te kyk nie.

Voel jy nie in die midde van die Covid-19 situasie ook verslae, teleurgesteld en moedeloos nie. Ons ken van die Goeie-Vrydag gevoel.

Maar een ding wat óns vandag weet, is dat die kruis-pad gee hoop.
Want ons is Sondag mense. Ons vier die opstanding.

Eventueel sou daardie verslae, moedelose, en hooplose omstanders by die kruis ook hoop kry. Sou hulle hoop kry wanneer Jesus aan hulle verskyn, of wanneer Hy saam met hulle stap en hulle harte warm word. Om Jesus in Sy opstandingsgestalte te beleef gee hoop!
Hoop en optimisme is nie sinoniem nie.

Al die verskriklike dinge is die “geboortepyne” van iets nuut en wonderliks wat sal aanbreek: “Dan sal die mense die Seun van die mens in die wolke sien kom met groot krag en majesteit” (Markus 13:26). Ons is nie op pad na die “einde” nie, maar na God se begin. Ons is oppad na nog ‘n “Sondagmôre” wat die angel uit die dood haal. Intussen moet gelowiges nie “verskrik” wees nie, sê Markus (13:7), MAAR tot die einde volhard (13:13) en waaksaam bly (13:37).

Die uitnodiging vir ons, is nie om nóg pessimisties nóg optimisties te kan leef nie, maar eerder om hoopvol te leef.
Na die kruis is daar ‘n opstanding.

Ds Natalia Strydom

Ps 16
1’n Gedig van Dawid.
Neem my in beskerming, o God;
ek soek skuiling by U.
2Ek het vir die Here gesê:
“Ek behoort aan U,
daar is vir my niks goeds nie behalwe by U.
3Die afgode in die land, so aantreklik vir baie –
met hulle wil ek niks te doen hê nie.
4Mag elkeen wat ‘n ander god vereer, baie smart beleef.
Vir afgode sal ek nie bloedoffers uitgiet nie,
hulle name sal ek nie op my lippe neem nie.”
5Here, U is my lewe, U sorg vir my.
Wat ek ontvang, kom alles van U af.
6’n Pragtige deel is vir my afgemeet,
ja, wat ek ontvang het, is vir my mooi.
7Ek sal die Here loof wat my tot die regte insig gebring het;
selfs in die nag bly ek bewus van wat Hy my leer.
8Ek het die Here altyd by my:
omdat Hy by my is, sal ek nie struikel nie.
9Daarom is ek bly en juig ek
en voel ek my veilig.
10U gee my nie oor aan die dood nie.
U laat u troue dienaar nie in die graf kom nie.
11U leer my hoe om te lewe.
By U is daar oorvloedige blydskap.
Uit u hand kom net wat mooi is.

Ons word elke dag gekonfroteer met ‘n siekte wat ons lewe kan bedreig. Die nuus is vol berigte oor wat aan die gang is met COVID-19. Meeste aandag wêreldwyd is gefokus op die pandemie wat soveel hartseer, onsekerheid en pyn veroorsaak. Ons word gekonfronteer met ons eie vrese en omdat ons nie veel het om ons aandag af te trek nie is dit moeilik om nie daaraan te dink nie. Ons huidige lewe, maar meer as dit, wat gebeur hierna. Wat gaan van ons land word, wat gaan van my toekoms word. Dit is alles vrae waarmee ons worstel. Onsekerheid.

In Ps 16 word die digter ook gekonfronteer met al die sleg in die lewe. Hy soek skuiling by God. Hy weet dat Hy veilig is by God, maak nie saak wat die omstandighede. Daarom kan hy ook raaksien dat daar steeds mooi in sy lewe is. ‘n Pragtige deel is vir my afgemeet. Hy sien raak dat dit wat hy in sy lewe het mooi en goed ook is.

Die Here het ons gemaak om voluit te leef. Hy wil nie hê dat ons net in die slegte goed moet vaskyk nie. Dis maklik om vasgevang te raak in al die chaos in die wêreld. Die chaos binne my, en dan vergeet ons soms dat daar wel mooi in die lewe ook is.

Ons weet nie wat gebeur more met ons nie. Ons het geen sekerheid rondom dit nie, maar ons kan die mooi rondom ons raaksien. Dit geniet, dit inneem. Wat is die mooi in jou lewe wat jy nodig het om weer raak te sien? Wat jy nodig het om weer te waardeer? Dalk jou verhouding met God, jou familie, gesin, jou huweliksmaat, dit wat mooi is in en rondom jou huis, ens. Daar is soveel wat ons kan raaksien wat ons so maklik net vanselfsprekend aanvaar want dit wat dalk net nog altyd daar gewees. Daar is meer in die lewe as die seer en hartseer in die lewe. Daarmee maak ons nie of dit nie daar is nie, maar dit help om agter te kom dat dit nie al is wat daar is nie.

Elana Dreyer – Brackendal gemeente

‘n Tree terug kan een van twee dinge beteken, of jy boer agteruit of jy staan terug om perspektief te kry.
Vir baie van ons gejaagde go-getters en presteerders en moeg gejaagdes kan hierdie stilstand van die grendeltyd net te veel wees. Hulle sê mos as jy nie vorentoe beweeg nie gaan jy eintlik agteruit.

Maar ‘n tree terug kan ook ook die tree terug wees van ‘n kunstenaar wat besig is om sy kunswerk te vorm. So elke dan en wan moet hy so n tree terug neem om perspektief op sy handewerk en vordering te kry. Dit kan ‘n oomblik wees en soms kan dit langer duur waar hy in stilte afstand neem en sy oë en sintuie oor sy handewerk laat gaan. Maar dan tree hy terug met sy kwas of bytel om die regte kleur en vorm te gee.

Toe Jesus se koninkryksprojek regtig stoom opgetel het het Hy ook behoefte gehad om daardie tree terug te neem voordat Hy verder kon gaan. Toe het Hy sy dissipels saam geneem in Getsemanie om te bid maar ook vir ons die opdrag gegee om te bid. Sy gebed was uniek, onherhaalbaar en ter wille van ons maar dit dien ook vir ons as voorbeeld en inspirasie. Let op die ooreenkoms met die Onse Vader.

Lees Matteus 26:37-46
Hy het vir Petrus en die twee seuns van Sebedeus saamgeneem. Toe het Hy bedroef en beangs geword 38 en vir hulle gesê: “Ek voel doodsbenoud. Bly hier en waak saam met My.”
39 Hy het ‘n entjie verder gegaan en daar gekniel met die gesig teen die grond en gebid: “My Vader, as dit moontlik is, laat hierdie lydensbeker by My verbygaan. Moet nogtans nie doen soos Ek wil nie, maar soos U wil.”
40 Daarna kom Hy na die dissipels toe terug en kry hulle aan die slaap. Hy sê toe vir Petrus: “Kon julle nie eens een uur lank saam met My waak nie? 41 Waak en bid, sodat julle nie in versoeking kom nie. Die gees is gewillig, maar die vlees is swak.”
42 ‘n Tweede keer het Hy gaan bid en gesê: “My Vader, as hierdie lydensbeker nie by My kan verbygaan sonder dat Ek dit drink nie, laat u wil geskied.”
43 Toe Hy terugkom, kry Hy hulle weer aan die slaap, want van die vaak kon hulle nie hulle oë oophou nie.
44 Hy het hulle weer alleen laat bly en ‘n derde keer gaan bid en dieselfde woorde gesê. 45 Toe kom Hy na die dissipels toe terug en sê vir hulle: “Slaap en rus julle nog? Die uur het gekom. Die Seun van die mens word in die hande van sondaars oorgegee. 46 Staan op, kom ons loop. Kyk, die man wat My verraai, is hier naby.”

Veral op drie punte stem Jesus se gebed ooreen met die Onse Vader-gebed:
Die aanroep van die Vader. Jesus het die Vader hierdie uur vertrou om Hom deur alles vas te hou en Hom as instrument in sy koninkryk te gebruik. So kan ons ook die Vader vertrou in hierdie tyd, veral ook dat Hy besig is om die kunswerk van sy koninkryk te voltooi.

Sy gebed: “Laat U wil geskied”. Jesus se stryd was om in harmonie te kom met die wil van die Vader. As ons vandag na die wil van God vra is dit veral om te vra: Wat is ons roeping en plek in die wêreld van vandag? Ons is tog ook medewerkers van God in sy koninkryk.

Daar word gepraat van die wêreld nc, na carona. Dit sal ‘n wêreld meer lokaal en gemeenskap georiënteerd wees. Mag hier dan ‘n liggaam van Christus wees en gelowiges wat die rigting aanwys na die koninkryk van God en ‘n lewe van liefde en diens

Sy oprag: Bid dat julle nie in versoeking kom nie. Dis Jesus se opdrag aan ons nadat Hy sy beker gedrink het om te bly glo in Hom, te bly hoop op Hom en sy koninkryk en aan te hou liefhê.

Mag hierdie tyd wat ons die tree terug geneem het ons help om weer die tree vorentoe te neem om met die kwas van die koninkryk te help vorm en kleur gee aan die lewe nc. Dit bly na alles die wêreld na Christus en in Christus.

Piet Botha – Brackendal